Tamil Virucham: Election

Showing posts with label Election. Show all posts

டெல்லி மாநகராட்சி புதிய மேயரை தேர்வு செய்ய நேற்று தேர்தல் நடந்தது. மேயர் பதவிக்கு பா.ஜ.க. சார்பில் ரஜினி அபி, காங்கிரஸ் சார்பில் சவீதா சர்மா போட்டியிட்டனர். டெல்லி மாநகராட்சி கவுன்சிலர்கள் 272 பேர் மேயரை தேர்வு செய்ய வாக்களித்தனர்.

நேற்று மாலை ஓட்டு எண்ணிக்கை நடந்தது. பா.ஜ.க. பெண் வேட்பாளர் ரஜினி அபி 170 வாக்குகள் பெற்று வெற்றி பெற்றார். காங்கிரஸ் வேட்பாளர் சவீதாவுக்கு அதிக வாக்குகள் கிடைக்க வில்லை. அவர் 88 ஓட்டுக்கள் வித்தியாசத்தில் தோல்வியைத் தழுவினார். 8 வாக்குகள் செல்லாததாக அறிவிக்கப்பட்டது.

டெல்லி புதிய மேயராக தேர்வாகியுள்ள ரஜினி அபி டெல்லி பல்கலைக்கழகத்தில் 19 ஆண்டுகள் பேராசிரியராக பணிபுரிந்தவர். முகர்ஜி நகர் தொகுதியில் இருந்து தேர்வான அவர் கடும் போட்டிக்கு பிறகு மேயர் ஆகி உள்ளார். டெல்லி நகரை சுத்தமான, பசுமையான நகரமாக மாற்ற பாடுபட போவதாக ரஜினி அபி அறிவித்துள்ளார். துணை மேயராக பா.ஜ.க. வேட்பாளர் 39 வயதான அணில் சர்மா தேர்வானார்.

88 Vote · bjp · congress · Election · Feature · INDIA · Select · Won Mayor

பாரதீய ஜனதா வெற்றி: டெல்லியில் பெண் மேயர் தேர்வு; 88 ஓட்டில் காங்கிரஸ் தோல்வி

நடிகர் ரஜினிகாந்த் ஓட்டு போட்ட விவகாரம் குறித்து பரபரப்பாக பேசப்பட்டது.

இந்த விவகாரம் குறித்து தமிழக தலைமை தேர்தல் அதிகாரி பிரவீண் குமார் செய்தியாளர்களிடம்,

’’சென்னையில் ஸ்டெல்லா மாரீஸ் கல்லூரி வாக்குச்சாவடியில் நடிகர் ரஜினிகாந்த் யாருக்கு ஓட்டுப் போட்டார் என்பது தனியார் தொலைக்காட்சியில் ஒளிபரப்பப்பட்டதாக புகார் கூறப்பட்டது.

அது தொடர்பாக அந்த வாக்குச்சாவடியில் நாங்கள் பதிவு செய்த வீடியோ காட்சிகளையும், தனியார் தொலைக்காட்சி ஒளிபரப்பையும் நாங்கள் பார்த்தோம். அவர் யாருக்கு ஓட்டுப் போட்டார் என்பது தெரியவில்லை.

அதுதொடர்பாக தேர்தல் பார்வையாளரும் புகார் கூறவில்லை. இருந்தாலும், அந்த வீடியோ பதிவை தேர்தல் கமிஷனுக்கு அனுப்பியுள்ளோம்.

அங்கு மறுவாக்குப்பதிவு நடத்துவதா? வேண்டாமா? என்பது பற்றி தேர்தல் கமிஷன்தான் முடிவு செய்யும்’’ என்று கூறினார்.

Commision answer · Election · Feature · Rajini · TAMILNADU · Vote

ரஜினி ஓட்டுப்போட்ட விவகாரம் : தேர்தல் அதிகாரி பதில்

சென்னை: தேர்தல் பணியில் ஈடுபட்ட முன்னாள் ராணுவத்தினருக்கான பணி ஊதியம் குறைக்கப்படவில்லை என்று முதல்வர் கருணாநிதி கூறியுள்ளார்.

தேர்தல் பாதுகாப்புப் பணியில் துணை ராணுவப் படையினர், முன்னாள் ராணுவத்தினர் உள்பட 24,000 பேர் ஈடுபடுத்தப்பட்டனர். அவர்களில் முன்னாள் ராணுவத்தினருக்கு ஒரு நாள் படியாக ரூ.300ம், உணவுப் படியாக ரூ.60ம் வழங்கப்பட்டது. ஆனால், இந்தத் தொகை குறைக்கப்பட்டு விட்டதாக அதிமுக பொதுச் செயலாளர் ஜெயலலிதா புகார் கூறியிருந்தார்.

இதற்கு மறுப்பு தெரிவித்து முதல்வர் கருணாநிதி வெளியிட்டுள்ள அறிக்கையில்,

ஆங்கில நாளேடு ஒன்றில் முன்னாள் ராணுவத்தினருக்கான தேர்தல் பணி ஊதியம் சென்ற தேர்தலில் இருந்ததை விட தற்போது குறைக்கப்பட்டுவிட்டதாக ஒரு செய்தி வெளிவந்தது. இதைத்தொடர்ந்து, அதிமுக பொதுச்செயலாளர் ஜெயலலிதா, முன்னாள் ராணுவத்தினரையும், பொதுமக்களையும் திசைதிருப்பி தேர்தல் நாளன்று குழப்பத்தை ஏற்படுத்த வேண்டும் என்ற உள்நோக்கத்தோடு அதை பெரிதுபடுத்தி வருவதை அறிந்து அதுகுறித்து உடனடியாக சம்பந்தப்பட்ட அதிகாரிகளிடம் கேட்டறிந்தேன்.

முன்னாள் ராணுவத்தினருக்கு கடந்த தேர்தலின்போது ஒருநாள் ஊதியமாக ரூ.300ம், உணவுப்படியாக ரூ.60ம் வழங்கப்பட்டது. தேர்தல் ஆணையமே இதை உணவுப்படியையும் சேர்த்து ஊதியமாக ரூ.275 ஆக குறைத்து அறிவித்தது. உடனே அரசு அதிகாரிகள் தேர்தல் ஆணையத்திடம் இவ்வாறு முன்னாள் ராணுவத்தினரின் ஊதியத்தை குறைத்தால் அதனால் அவர்கள் பெரிதும் பாதிக்கப்படுவார்கள் என்று எடுத்துக்கூறியதன் பேரில் அவர்கள் ஏற்கனவே பெற்றுவந்த ஊதியமான ரூ.300யைத் தொடரவும் உணவுப்படியாக ரூ.60ம் வழங்கப்படுகிறது.

எனவே, முன்னாள் ராணுவத்தினர் எந்த வகையிலும் பாதிக்கப்படவில்லை. வேண்டுமென்றே உண்மையை மறைத்து தேர்தல் நாளன்று மக்களை திசை திருப்பும் வகையில் அந்த ஆங்கில நாளிதழும், ஒரு தனியார் தொலைக்காட்சியும் ஈடுபட்டுள்ளது கடும் கண்டனத்துக்குரியது. சட்டப்படியான நடவடிக்கைக்கு உரியது என்று கூறியுள்ளார்.

தேர்தல் பணியில் ஈடுபடும் ராணுவத்தினர், முன்னாள் ராணுவத்தினருக்கு தேர்தல் ஆணையம் மூலமாக மத்திய அரசின் நிதி கொடுக்கப்படுகிறது. பணியில் ஈடுபடுவோருக்கு முதலில் மாநில அரசு பணத்தைக் கொடுத்து விடும். இந்தப் பணம் பின்னர் மத்திய அரசு மூலமாக மாநில அரசுகளுக்கு வழங்கப்படும்.

எனவே, ஜெயலலிதா சொல்வது போல அந்தத் தொகையை குறைப்பதற்கு மாநில அரசு தனிப்பட்ட முறையில் முடிவெடுத்து செயல்படுத்திட முடியாது என்பது குறிப்பிடத்தக்கது. அதைச் செய்ய அதிகாரம் உள்ளது தேர்தல் ஆணையம் மட்டும்.

பாதுகாப்புப் பணியில் இருந்த முன்னாள் ராணுவத்தினரை தேர்தல் பணியில் ஈடுபட்ட திமுகவினருக்கு எதிராக திசை திருப்ப ஜெயலலிதா இவ்வாறு புகார் கூறியதாகத் தெரிகிறது.

army · Election · Ex · Feature · Personal in karunanidhi and Jayalalitha · TAMILNADU

'முன்னாள் ராணுவத்தினரை திசை திருப்ப முயன்ற ஜெ'-கருணாநிதி

கேரள சட்டசபை தேர்தல் இறுதிக்கட்ட பிரசாரம் நேற்று நடந்தது.கேரள மந்திரி சுரேந்திரன் பிள்ளை தான் போட்டியிடும் திருவனந்தபுரம் தொகுதியில் பிரசாரத்தில் ஈடுபட்டு இருந்தார். பூதுரா என்ற இடத்தில் அவர் பிரசாரம் செய்து கொண்டிருந்தபோது காங்கிரஸ் தொண்டர்களுக்கும் கம்யூனிஸ்டு தொண்டர்களுக்கும் இடையே திடீர் மோதல் ஏற்பட்டது.

ஒருவரை ஒருவர் பயங்கரமாக தாக்கிக் கொண்டனர். கல்வீச்சும் நடந்தது. இதில் ஒரு கல் மந்திரி சுரேந்திரன் பிள்ளை தலையில் பட்டது. இதில் அவரது மண்டை உடைந்து ரத்தம் கொட்டியது. அவரை ஆஸ்பத்திரியில் சேர்த்தனர். இந்த சம்பவத்தால் அந்த பகுதியில் பதட்டம் நிலவுகிறது.

முன்னதாக இதே பகுதியில் மத்திய மந்திரி ஏ.கே. அந்தோணி பிரசாரம் செய்தார். அப்போது அவரை பிரசாரம் செய்ய விடாமல் கம்யூனிஸ்டு தொண்டர்கள் தடுக்க முயன்றனர். இதனாலும் மோதல் ஏற்பட்டது. அதேபோல காயம்குணம், கருணாகப்பிளி, பிரிதலமனா, கைபிமங்கலம் ஆகிய இடங்களிலும் இரு கட்சியினர் இடையே மோதல் ஏற்பட்டது.

Election · Feature · INDIA · minister · Stone thrown on Kerala

தேர்தல் பிரசாரத்தில் கேரள மந்திரி மீது கல்வீச்சு; மண்டை உடைந்தது

கொளத்தூர் தொகுதியில் போட்டியிடும் தனக்கு 50 ஆயிரம் வாக்குகள் வித்தியாசத்தில் வெற்றி கிடைக்கும் என்று, திமுக பொருளாளர் மு.க.ஸ்டாலின் கூறியுள்ளார்.

இதுகுறித்து மு.க.ஸ்டாலின் மேலும் கூறியதாவது, கொளத்தூர் தொகுதியில் என்னை மக்கள் சிறப்பாக வரவேற்றனர். இது எனக்கு மகிழ்ச்சி அளிக்கிறது. கொளத்தூர் தொகுதி புதிதாக உருவானது.

அந்த தொகுதியில் முதல் முதலாக, முதன் முறையாக நான் வேட்பாளராக போட்டியிடுவதும் மகிழ்ச்சி அளிக்கிறது. மக்களுக்கு நான் நல்லது செய்வேன் என்று நம்பிக்கை இருக்கிறது. மேயராக இருந்து, அமைச்சராக இருந்து, துணை முதல் அமைச்சராக இருந்து பணியாற்றியதை மக்கள் பார்த்தார்கள். ஆகையால் குறைந்தது 50 ஆயிரம் வாக்குகள் வித்தியாசத்தில் வெற்றி பெறுவேன் என்றார்.

Assemply · Election · Feature · MK Stalin · Speach · TAMILNADU

50 ஆயிரம் வாக்குகள் வித்தியாசத்தில் வெற்றி கிடைக்கும்: மு.க.ஸ்டாலின்

கூட்டணிக் கட்சிகளுக்கு மிகப்பெரிய துரோகம் செய்த அதிமுக சட்டமன்ற தேர்தலில் மிகப்பெரிய தோல்வியை சந்திக்கும் என, அகில இந்திய நாடாளும் மக்கள் கட்சித் தலைவர் நடிகர் கார்த்திக் கூறியுள்ளார்.

மதுரையில் செய்தியாளர்களிடம் பேசிய நடிகர் கார்த்திக்,

கூட்டணிக் கட்சிகளுக்கு அதிமுக துரோகம் செய்துவிட்டது. நாடாளும் மக்கள் கட்சியின்

வேட்பாளர்களை கடத்தி, சதி செய்த அதிமுக மீது நடவடிக்கை எடுக்காமல், அதிமுகவுக்கு அதரவாக தேர்தல் ஆணையம் நடந்து கொள்கிறது.

கூட்டணிக் கட்சிகளுக்கு மிகப்பெரிய துரோகம் செய்த அதிமுக சட்டமன்ற தேர்தலில் மிகப்பெரிய தோல்வியை சந்திக்கும். பொதுமக்கள் மத்தியில் அதிமுகவுக்கு வெறுப்பு வந்துள்ளது. வாக்குகள் அதிமுகவுக்கு விழாது. அதிமுகவுக்கு வெற்றியே கிடையாது என்றார்.

Admk · Election · Feature · No Win · Speach to Actor Karthik · TAMILNADU

அதிமுகவுக்கு வெற்றியே கிடையாது: கார்த்திக்

திருவாரூர் : ""சட்டசபைக்கு என்னை 12வது முறையாக தேர்ந்தெடுத்து அனுப்ப வேண்டும்,'' என முதல்வர் கருணாநிதி, திருவாரூரில் மலரும் நினைவுகளைக் கூறி உருக்கமாக பேசினார்.

திருவாரூரில் இறுதிக் கட்ட பிரசாரமாக கீழ வீதியில் கருணாநிதி பேசியதாவது:நான் திருவாரூரில் எத்தனையோ கூட்டங்களில், விழாக்களில் பேசியிருக்கிறேன். இன்று, மணவறையில் உள்ள புதுப்பெண் போல உங்கள் முன் வந்துள்ளேன்.அண்ணாதுரை தேர்தலில் போட்டியிடுமாறு ஆணையிட்டார். அதன்படி, எந்த தொகுதியில் போட்டியிடலாம் என ஆய்வு செய்து, நாகையில் போட்டியிடலாம் என்று அண்ணாதுரையிடம் தெரிவித்தேன். அதற்கு அண்ணாதுரை, நாகையில் போட்டியிடுவதாக இருந்தால் சொந்த ஊரான திருவாரூரில் போட்டியிட வேண்டும். தனித்தொகுதியாக இருந்ததால் குளித்தலையில் போட்டியிடு என கூறினார். அதன்படி குளித்தலையில் போட்டியிட்டு வெற்றி பெற்றேன்.

பின் தஞ்சை, சென்னை உட்பட 11 இடங்களில் போட்டியிட்டு வெற்றி பெற்றுள்ளேன். 12வது முறையாக திருவாரூரில் போட்டியிடுகிறேன். என்னை சட்டசபைக்கு தேர்ந்தெடுத்து அனுப்பி வைக்க வேண்டும். இந்த 12 என்பதற்கும், தஞ்சை மாவட்டத்திற்கும் தொடர்புண்டு. இந்த மாவட்டத்தில் உள்ள கும்பகோணத்தில், 12 ஆண்டுகளுக்கு ஒரு முறை மாமாங்கம் வரும்.திருவாரூரில் நண்பர் தென்னனுடன் சேர்ந்து விளையாடியது தான் இந்த கீழ வீதி. அவர் மட்டுமல்லாமல் வேறு சில நண்பர்களுடனும் விளையாடியுள்ளேன். திருவாரூர் போர்டு உயர்நிலைப்பள்ளியில் நானும், நண்பர்களும் படித்தபோது எடுக்கப்பட்ட போட்டோ ஒன்றை, நான் வரும் வழியில் சிறுமி ஒருவர் எனக்கு பரிசாக வழங்கினார். அதைப் பார்த்தும் அப்போது உள்ள நினைவுகள் வந்தன. மாணவப் பருவத்திலேயே அண்ணாதுரை கொள்கை மனதில் பதிந்து, நான் சுயமரியாதை காரணாக இப்போது வரை உள்ளேன்.

ஆனால், ஆத்திகருக்கும், பக்தர்களுக்கும் எந்த தீங்கும் விளைவிப்பவன் அல்ல நான். கொள்கை வேறு, நடத்தை வேறு. திருவாரூரில் தேரோட்டம் பற்றி சட்டசபையில் கேட்டபோது, நண்பர் காளிமுத்து திருவாரூரிலே தேரோட்டம் நடைபெறுகிறதா என கேட்டார். தெரியவில்லை என்றேன். "ஏரோட்டும் மக்களெல்லாம் ஏங்கி தவிக்கையிலே, தேரோட்டம் ஏன் உனக்கு தியாகராஜா' என்று பாடினீர்களே. இன்றைக்கு அனுமதிக்கிறீர்களா... இப்போது ஏங்கி தவிக்கவில்லை என்பதால் தேரோட்டம் தேவை என்று கூறினேன்.

மதவாதிகள், ஆத்திகர்கள் கொள்கைகளை எதிர்க்க மாட்டேன் என்று கூறினேன். மக்களிடம் திணிக்காமல் கருத்து கூற வேண்டும் என்பது தான் என்னுடைய வாதம். அதனால் தான், அண்ணாதுரை காலத்திலும் அதன் பிறகு எங்கும் சுய மரியாதை கொள்கையை திணித்து புண்படுத்தவில்லை. ஆட்சி வேறு; கொள்கை வேறு.எதிர்காலத்திலும் புண்படுத்த மாட்டேன். தி.மு.க., கொள்கை கடவுளுக்கு எதிரானதல்ல. கடவுள் வேண்டுமானால் எதிரியாக இருக்கலாம். கடவுளை ஏற்றுக்கொள்கிறீர்களா என்பதல்ல பிரச்னை. கடவுள் ஏற்றுக்கொள்கிற அளவுக்கு நடந்து கொள்கிறேனா என்பது தான்.சேது சமுத்திரத் திட்டத்தை ராமருக்கு ஆகாது என கூறி நிறுத்திவிட்டனர். மீண்டும் தி.மு.க., ஆட்சி வந்தால், இந்த திட்டத்தை தொடர மத்திய அரசிடம் வலியுறுத்துவோம்.

தி.மு.க., ஏதோ சிலருக்கு பதவிகளுக்காக துவங்கப்பட்ட கழகம் அல்ல. தமிழ் மொழிக்கு பெருமை கிடைப்பதற்காக துவங்கப்பட்டது. திராவிட உணர்வை ஒழிக்க சிலர் கங்கணம் கட்டி வருகின்றனர். திராவிடன் என்ற சொல் இன்று நேற்று ஏற்பட்டதல்ல. தமிழ்த்தாய் வாழ்த்து, தேசிய கீதம் ஆகியவற்றில் கூட திராவிடன் என்ற வார்த்தை வருகிறது. இன்று புதியதாக துவங்கப்படும் கட்சிகள் கூட, திராவிட அடைமொழியுடன் துவங்குகின்றனர். திராவிடத்தை மதிக்கின்றனரோ இல்லையோ, நம்மை பழித்து பேசி வருகின்றனர். இந்த இயக்கத்தை அழிக்க நினைப்பவர்கள் அவர்கள் அழிவார்களே தவிர இந்த இயக்கம் அழியாது. எச்சரிக்கையாக அல்ல; அறிவுரையாகச் சொல்கிறேன்.

தேர்தலில் போட்டியிருக்க வேண்டும். வெறுப்பின் காரணமாக போட்டியிருக்க கூடாது. இந்த தொகுதியில் வெற்றி பெற்றாலும், என்னை எதிர்த்து போட்டியிட்டவரை அழைத்து பேசி அரவணைத்து, இந்த தொகுதிக்கு வேண்டியவற்றை செய்து முடிப்பேன். நானே ஒரு வேளை முதல்வராகிவிட்டால், எதிர்க்கட்சி எம்.எல்.ஏ.,க்களை வெறுக்க மாட்டேன். அவர்களின் தேவைகளை உணர்ந்து நிறைவேற்றுவேன். எனவே, எனக்கு ஆதரவு அளிக்குமாறு கேட்டுக் கொள்கிறேன்.இவ்வாறு முதல்வர் கருணாநிதி பேசினார்.

CM · Election · Feature · Karunanidhi · People · TAMILNADU

12வது முறையாக தேர்ந்தெடுத்து அனுப்புங்கள்: முதல்வர் கருணாநிதி வேண்டுகோள்

முன்னாள் இந்திய கிரிக்கெட் கேப்டன் செளரவ் கங்குலிக்கு பதிலாக தற்போதைய கேப்டன் தோனியை தனது விளம்பரத் தூதராக தேர்தல் ஆணையம் நியமித்துள்ளது.

முன்னாள் குடியரசுத்தலைவர் ஏபிஜே. அப்துல் கலாமையும் தனது விளம்பரத் தூதராக தேர்தல் ஆணையம் நியமித்துள்ளது.

முன்னதாக கங்குலியின் அரசியல் நடுநிலைமை குறித்து கேள்வி எழுப்பப்பட்டதால் பிரச்சாரத்தில் இருந்து தன்னை விடுவிக்குமாறு தேர்தல் ஆணையத்துக்கு கங்குலி கடிதம் எழுதியிருந்தார்.

சில அரசியல் சர்ச்சைகளில் தன்னை சிக்கவைப்பது தொடர்பாக கங்குலி மன வருத்தத்தை வெளிப்படுத்தினார்.

அவரது வேண்டுகோளை ஏற்று அவரை வெளியேற்ற தேர்தல் ஆணையம் முடிவு செய்துள்ளது என மேற்கு வங்க தலைமை தேர்தல் அதிகாரி சுனில் குப்தா தெரிவித்தார்.

Commission · dhoni · Election · INDIA

தேர்தல் கமிஷன் விளம்பரத் தூதர் தோனி

டெல்லி: வரும் தேர்தலில் தமிழகத்தில் ஜெயலலிதா தலைமையிலான அதிமுக கூட்டணியும், மேற்கு வங்கத்தில் மம்தா பானர்ஜி தலைமையில் திரிணாமூல் காங்கிரஸ் கூட்டணியும் ஆட்சியைப் பிடிக்கும் என இந்தியா டுடே கருத்துக் கணிப்பு தெரிவித்துள்ளது.

ஏப்ரல் 13ம் தேதி தொடங்கி மே 10ம் தேதி வரை பல கட்டங்களாக நடக்கவிருக்கும் 5 மாநிலத் தேர்தல்கள் குறித்து பல்வேறு பத்திரிகை, தொலைக்காட்சி மற்றும் கள ஆய்வு நிறுவனங்கள் கருத்துக் கணிப்புகளை நடத்தி வருகின்றன.

இவற்றில் கடந்த வாரம் வெளியான நக்கீரன் கருத்துக் கணிப்பில், தமிழகத்தில் திமுக கூட்டணிக்கு 146 இடங்கள் கிடைக்கும் என்றும், அதிமுகவுக்கு 80 இடங்கள் கிடைக்கும் என்றும் 8 இடங்களில் இழுபறி நிலவும் என்றும் கூறப்பட்டிருந்தது.

இந் நிலையில் இந்தியா டுடே-ஓஆர்ஜி நிறுவனங்கள் இணைந்து மேற்கொண்ட கருத்துக் கணிப்பு முடிவுகள் வெளியாகியுள்ளன.

இதில் தமிழகத்தில் ஜெயலலிதா தலைமையிலான அதிமுக கூட்டணி 164 தொகுதிகளையும், கருணாநிதி தலைமையிலான திமுக கூட்டணி 68 தொகுதிகளிலும் வெற்றி பெறும் என்று கூறப்பட்டுள்ளது. 2 தொகுதிகளில் இழுபறி நிலை நீடிக்கும் என்கிறது இந்தக் கருத்துக் கணிப்பு.

சதவீத அடிப்படையில் பார்த்தால், அதிமுக கூட்டணிக்கு 50 சதவீதத்தினரும், திமுக கூட்டணிக்கு 45 சதவீதத்தினரும் ஆதரவு தெரிவித்துள்ளனர்.

2 ஜி விவகாரம்:

திமுகவுக்கு பெரும் பின்னடைவாக இந்தக் கருத்துக் கணிப்பில் தெரிய வந்திருப்பது 2 ஜி ஸ்பெக்ட்ரம் ஒதுக்கீட்டில் எழுந்த முறைகேடுகள்தான். இதுகுறித்த முழுமையான விவரங்கள் தங்களுக்குத் தெரியும் என்று 50.5 சதவீதத்தினர் கருத்துத் தெரிவித்துள்ளனர்.

விலைவாசிதான் இந்த ஆட்சியின் மிகப் பெரிய பிரச்சினை என்று 59.3 சதவீதத்தினர் கூறியுள்ளனர்.

ஜெயலலிதா ஆட்சியை விட கருணாநிதி ஆட்சியில்தான் ஊழல் அதிகம் என்று 39.3 சதவீதத்தினர் குறிப்பிட்டுள்ளனர். திமுக ஆட்சிக் காலத்தில் வேலைவாய்ப்புகள் ஏராளம் என்று கூறப்பட்டு வந்த நிலையில், 37 சதவீதத்தினர் அதற்கு எதிராகக் கருத்து தெரிவித்துள்ளனர்.

கருத்துக் கணிப்பில் பங்கேற்ற பெரும்பாலானோர், இலங்கை கடற்படையினரால் தமிழ் மீனவர்கள் கொல்லப்படுவதைக் கடுமையாகக் கண்டித்துள்ளனர். இதனை திமுக அரசு தடுக்கத் தவறியதாகக் கருத்துக் கூறியுள்ளனர்.

கருத்துக் கணிப்பில் பங்கேற்றவர்களில் 51 சதவீதத்தினர் கண்டிப்பாக ஆட்சி மாற்றம் அவசியம் என்று கூறியுள்ளனர்.

யார் முதல்வராக வேண்டும் என்ற கேள்விக்கு 36.1 சதவீதம் பேர் ஜெயலலிதாவுக்கும், 34.1 சதவீதத்தினர் கருணாநிதிக்கும் வாக்களித்துள்ளனர். இந்தக் கேள்விக்கு ஸ்டாலின் பெற்றுள்ள வாக்குகள் 3.5 சதவீதம் மட்டுமே. ப சிதம்பரத்துக்கு 0.6 சதவீதம் பேர்தான் வாக்களித்துள்ளனர்.

இதே போல, மேற்கு வங்கத்தில் கம்யூனிஸ்ட்களின் தொடர் ஆட்சிக்கு இந்த முறை முடிவு கட்டப்படும் என்று இந்தக் கருத்துக் கணிப்பு கூறியுள்ளது.

மேற்கு வங்கத்தில்...

மம்தா தலைமையிலான கூட்டணிக்கு 182 தொகுதிகளும், கம்யூனிஸ்ட் அணிக்கு 101 தொகுதிகளும், மற்ற கட்சிகளுக்கு 11 இடங்களும் கிடைக்கும் என இக்கருத்துக் கணிப்பு முடிவுகள் கூறுகின்றன.

53 சதவீதம் மேற்கு வங்க வாக்காளர்கள் ஆட்சி மாற்றம் தேவை என்று கூறியுள்ளனர். 38 சதவீதத்தினர் இப்போதுள்ள ஆட்சி தொடர ஆதரவளித்துள்ளனர்.

இவ்வாறு அந்தக் கருத்துக் கணிப்பில் கூறப்பட்டுள்ளது.

2009ல் பொய்யான இந்தியா டுடே கருத்துக் கணிப்பு:

ஆனால், 2009ம் ஆண்டு மக்களவைத் தேர்தலையொட்டி இந்தியா டுடே வெளியிட்ட கருத்துக் கணிப்பு பொய்த்தது குறிப்பிடத்தக்கது.

அப்போதைய கருத்துக் கணிப்பில் அதிமுக தான் 21 இடங்களில் வெல்லப் போவதாகவும், ஜெயலலிதா மீண்டும் தலையெடுக்கப் போவதாகவும், திமுக-காங்கிரஸ் கூட்டணிக்கு தோல்வியே ஏற்படும் என்றும் கூறப்பட்டிருந்தது.

ஆனால், அந்தத் தேர்தலில் இந்தக் கருத்துக் கணிப்பில் கூறப்பட்டிருந்தது அப்படியே உல்டா ஆனது நினைவுகூறத்தக்கது.

அதிமுகவே வெல்லும்-அவுட்லுக், எம்டிஆர்ஏ கணிப்பு:

அதே போல அவுட்லுக் வார இதழ் நடத்தியுள்ள கருத்துக் கணிப்பில் 2011 சட்டப் பேரவை பொதுத் தேர்தலில் அதிமுக- தேமுதிக- இடதுசாரிகள் கூட்டணி ஆட்சிக்கு வரும் என்று 54 சதவீதம் பேரும்,

திமுக- காங்கிரஸ்- பாமக கூட்டணி ஆட்சிக்கு வரும் என்று 37.4 சதவீதத்தினரும் பேரும், மற்ற கட்சிகள் அல்லது அணி ஆட்சிக்கு வரும் என்று 8.6 சதவீதம் பேரும் கருத்து தெரிவித்துள்ளதாகக் கூறப்பட்டுள்ளது.

Comit · Election · Feature · INDIA · India today · TAMILNADU · Win to Jayalalitha

தமிழகத்தில் ஜெயலலிதாவே வெல்வார்-இந்தியா டுடே கணிப்பு

ஈரோடு: ""சத்தமில்லாத நெருக்கடி நிலை தமிழகத்தில் நிலவுகிறது,'' என, முதல்வர் கருணாநிதி குற்றம் சாட்டினார்.

ஈரோட்டில் நேற்று இரவு நடந்த தி.மு.க., பொதுக்கூட்டத்தில் முதல்வர் கருணாநிதி பேசியதாவது: திராவிட இயக்கத்தை தென்னகத்தில் பரவச் செய்யவும், இந்தியாவின் இறையாண்மையை காப்பாற்றவும், திராவிட இயக்கம், தி.மு.க., என்ற அரசியல் இயக்கமாக மாறியது. முதல் தேர்தல் அதிகமான வெற்றியை தராவிட்டாலும், அதை தொடர்ந்து ஆட்சியை பிடிக்குமளவுக்கு வளர்ந்து, இன்றைய தினம் ஆட்சிப் பொறுப்பிலே இருக்கிறது. இந்தக் கூட்டணியில் உள்ள அத்தனை பேரும், அடியேனை முதல்வராக அடையாளம் காட்டுகின்றனர். ஐந்து முறை முதல்வனாக இருந்த என்னை ஆறாவது முறையும் முதல்வராக்க எண்ணுகின்றனர். இந்த அணி என்னை சுட்டிக்காட்டுவது போல், எதிரணியில் சுட்டிக் காட்ட முடியாது. அவ்வாறு சுட்டிக் காட்டினால் மறுநாள் பத்திரிகைகளில் அடிதடி, ரகளை என்ற புகைப்படங்கள் வெளியாகும். அங்கே ஒருவர் ஆண் தலைவர், இன்னொருவர் பெண் தலைவர் இருக்கிறார். ஒரு வேளை நான் கூறிவிட்டேன் என்பதற்காக, இதன் பிறகு பெயரை சொன்னாலும் சொல்லலாம். கூட்டணியினர் என்னை நம்புகின்றனர். நான் அவர்களை நம்புகிறேன். ஆட்சியில் நாங்கள் செய்த சாதனைகளை, வாக்குறுதிகளை நிறைவேற்றியதை பார்த்துவிட்டு என்னை நம்புகின்றனர்.

ஒரு அரசின் திட்டங்களை, அடுத்து வந்த அரசும் தொடர்ந்தால் தான் அந்த திட்டம் தொடர முடியும். காமராஜர் செயல்படுத்திய ஆரம்பக்கல்வி திட்டத்தை, சத்துணவு திட்டத்தை, நானும், அதன் பிறகு எம்.ஜி.ஆரும், அவரைத் தொடர்ந்து நாங்களும் தொடர்ந்தோம். இது தான் உண்மையான சத்துணவு என்பதற்கேற்ப ஐந்து முட்டை வழங்குகிறோம். பிள்ளையை ஊட்டி வளர்த்து, ஆரம்ப கல்வியையும் ஊட்டிய அரசு தான் தி.மு.க., அரசு. மத்திய அமைச்சர்கள் புகழக் கூடிய அளவுக்கு, மற்ற மாநிலங்களுடன் போட்டியிடும் வகையில் தமிழகம் கல்வித்துறையில் வளர்ந்திருக்கிறதென்றால், அதற்கு தி.மு.க., அரசு தான் காரணம் என்பதை மறுக்க முடியுமா? "தொழில் வளர்ச்சியை நசுக்கிவிட்டார்' என்று அம்மையார் குறை கூறியிருக்கிறார். தமிழகத்தில் 50 ஆயிரம் கோடி ரூபாய்க்கு தொழில் துவங்கப்பட்டுள்ளது. தமிழகத்தில் தொழில் துவங்க வெளிநாட்டினர் போட்டி போடும் அளவுக்கு தொழில் வளர்ந்துள்ளது. எங்கு பார்த்தாலும் நிறைய தொழிற்சாலைகள் உருவானதால் மின்சார பற்றாக்குறை ஏற்பட்டுள்ளது. அ.தி.மு.க., அரசு மின் திட்டங்களை துவங்கவில்லை. நாம் தான் துவங்கியிருக்கிறோம்.நெய்வேலி விரிவாக்க திட்டமும், கூடங்குளம் திட்டமும் முடிவடையவில்லை. இத்திட்டங்கள் நிறைவடைந்தால், உங்களுக்கு போதும் போதும் என்ற அளவுக்கு மின்சாரம் கிடைக்கும்.

அன்னை இந்திரா காலத்தில் நெருக்கடி நிலை நாட்டில் இருந்தது. ஆனால், பிற்காலத்தில் அவர் கூறும் போது, "நெருக்கடி காலத்தில் ஏற்பட்ட கொடுமைகளுக்கு அதிகாரிகள் தான் காரணம்' என்று கூறி, சென்னையில் நடந்த கூட்டத்தில் மன்னிப்பு கேட்டார். அது போன்ற ஒரு கொடுமை இப்போது மேல்மட்ட அதிகாரிகளால் அமலுக்கு வந்துள்ளது. சத்தமில்லாமல் எமர்ஜென்ஸி நிலைமை இப்போது தமிழகத்தில் நடக்கிறது. தி.மு.க., கூட்டணியை உடைக்க நெருக்கடி கால கொடுமை மீண்டும் வீசப்படுகிறது. இதை நிதானமாக பார்த்துக் கொண்டிருக்கிறோம். தமிழகம் இருக்கும் வரை, தமிழனுக்கு சுயமரியாதை உணர்வு இருக்கும் வரை எங்கள் அணிக்கு தோல்வி கிடையாது. என்றைக்கும் வெற்றி தான். இவ்வாறு கருணாநிதி பேசினார்.

Election · Feature · Karunanidhi · TAMILNADU

தமிழகத்தில் நெருக்கடி நிலை: கருணாநிதி "திடுக்' குற்றச்சாட்டு

சென்னை:""என் கட்சி வேட்பாளர்கள் மூவரை அ.தி.மு.க.,வினர் துப்பாக்கிமுனையில் மிரட்டியுள்ளனர். ஒரு வேட்பாளரை விலைக்கு வாங்கி விட்டனர்,'' என்று அகில இந்திய நாடாளும் மக்கள் கட்சி தலைவர் கார்த்திக் புகார் கூறினார்.இது குறித்து சென்னையில் நேற்று நிருபர்கள் சந்திப்பில் கார்த்திக் கூறியதாவது:எங்கள் அகில இந்திய நாடாளும் மக்கள் கட்சி, 27 தொகுதிகளில் போட்டியிட முடிவு செய்திருந்தது. இதில், எட்டு பேர் வாபஸ் பெற்று விட்டனர். தற்போது எனது கட்சியை சேர்ந்த 19 பேரும், நாங்குநேரி மற்றும் திருநெல்வேலி தொகுதிகளில் சுயேச்சையாக போட்டியிடும் இருவரும் சேர்ந்து, எனது கட்சியின் சார்பில் 21 பேர் போட்டியிடுகின்றனர்.எனது கட்சியின் சார்பில் கம்பம் தொகுதி வேட்பாளர் ரவிச்சந்திரன், போடி வேட்பாளர் அறிவரசன், உசிலம்பட்டி வேட்பாளர் வீரண்ணராஜு ஆகியோர் ராயப்பேட்டையில் ஒரு தனியார் லாட்ஜில் தங்கியிருந்தனர்.இவர்களை, அ.தி.மு.க.,வைச் சேர்ந்தவர்கள் இரு தினங்களுக்கு முன், ஸ்கார்பியோ காரில் கடத்தி துப்பாக்கிமுனையில் மிரட்டி, வாபஸ் வாங்கச் சொல்லியுள்ளனர். இதில், அறிவரசன் அவர்களுடன் சேர்ந்து விட்டார். ரவிச்சந்திரனையும், வீரண்ணராஜுவையும் திருச்சி - திண்டுக்கல் இடையே மிரட்டி இறக்கி விட்டுள்ளனர். மிரட்டப்பட்ட வேட்பாளர்கள் மூலம் தேர்தல் கமிஷனருக்கு புகார் கொடுக்க உள்ளோம்.
நான் நாகரிகமாக அரசியல் நடத்த விரும்புகிறேன். சிலர் அநாகரிக அரசியல் நடத்துகின்றனர். வேட்பாளர்களை மிரட்டலாம், என்னை மிரட்டி பணிய வைக்க முடியாது. இனி இருக்கும் எனது வேட்பாளர்களை யாரும் எதுவும் செய்ய முடியாது. எனது வேட்பாளர்களை ஆதரித்து திருநெல்வேலி மாவட்டம் அம்பாசமுத்திரத்திலிருந்து இன்று பிரசாரத்தை துவங்குகிறேன். ஒரு நாளைக்கு இரண்டு தொகுதிகள் வீதம் பிரசாரம் செய்ய உள்ளேன்.எனது கட்சி போட்டியிடாத தொகுதிகளில் உள்ள எனது கட்சியை சேர்ந்தவர்கள், அவர்கள் இஷ்டத்திற்கு யாருக்கு வேண்டுமென்றாலும் ஓட்டளிக்கலாம். அவர்கள் யாருக்கு ஓட்டளிக்க வேண்டும் என்று என்னை கேட்டால், நான் தி.மு.க., கூட்டணிக்கு ஓட்டளிக்கலாம் என்று தான் சொல்வேன். இவ்வாறு கார்த்திக் கூறினார்.

Actor · Commission · Election · Karthik · TAMILNADU

தேர்தல் கமிஷனிடம் நடிகர் கார்த்திக் புகார்

கவுகாத்தி:"அடுத்த மாதம் நடக்கவுள்ள ஐந்து மாநில சட்டசபை தேர்தல்களிலும், பா.ஜ.,வுக்கு கணிசமான வெற்றி வாய்ப்பு உள்ளது. இருந்தாலும், அசாம் மாநில தேர்தலுக்கு முக்கியத்துவம் செலுத்த திட்டமிட்டுள்ளோம்' என, பா.ஜ., மூத்த தலைவர் சுஷ்மா சுவராஜ் கூறினார்.அசாம் மாநில சட்டசபை தேர்தலில் பிரசாரம் செய்வதற்காக, நேற்று கவுகாத்தி வந்த பா.ஜ., மூத்த தலைவர் சுஷ்மா சுவராஜ், நிருபர்களுக்கு அளித்த பேட்டி:அசாம், மேற்கு வங்கம், தமிழகம், கேரளா மற்றும் புதுச்சேரி மாநிலங்களில் அடுத்த மாதம் சட்டசபை தேர்தல் நடக்கஉள்ளது.
இந்த ஐந்து மாநிலங்களிலும் பா.ஜ.,வுக்கு கணிசமான வெற்றி வாய்ப்பு உள்ளது. இருந்தாலும், அசாம் மாநில தேர்தலுக்கு முக்கியத்துவம் கொடுக்க விரும்புகிறோம். இங்கு எங்கள் கட்சிக்கு நல்ல எதிர்காலம் உள்ளது.தற்போது தேர்தல் நடக்கவுள்ள இந்த ஐந்து மாநிலங்களில், அசாமை தவிர மற்ற மாநிலங்களில் எங்களுக்கு எம்.எல்.ஏ.,க்கள் இல்லை. இந்த தேர்தலில் அந்த நிலை மாறும். மேற்கு வங்கத்தில் ஒரு சில தொகுதிகளில் எங்களுக்கு வெற்றி கிடைக்கும். கேரள சட்டசபையில் முதல் முறையாக எங்கள் கட்சி சார்பில், இந்த முறை எம்.எல்.ஏ.,க்கள் நுழைவர். இவ்வாறு சுஷ்மா சுவராஜ் கூறினார்.

Asam · Election · Feature · INDIA · sushma swaraj

அசாம் தேர்தலில் வெற்றி பெற பா.ஜ., அதிக அக்கறை: சுஷ்மா

சேலம்: நடிகர் விஜய் அ.தி.மு.க. கூட்டணிக்கு ஆதரவு தெரிவிப்பதை எதிர்த்து சேலத்தில் விஜய் மக்கள் இயக்கத்தை கலைத்து, உறுப்பினர் கார்டுகளை தீவைத்து எரித்தனர் ரசிகர்கள்.

நடைபெற உள்ள தமிழக சட்டமன்ற தேர்தலில் அ.தி.மு.க. கூட்டணிக்கு நடிகர் விஜய்யின் ரசிகர் மன்ற அமைப்பான விஜய் மக்கள் இயக்கம் ஆதரவு தெரிவித்துள்ளது. இதனை திருச்சியில் அதிமுக பொதுச்செயலாளர் ஜெயலலிதாவை சந்தித்தப் பின்னர், எஸ்.ஏ.சந்திரசேகரன் அறிவித்தார்.

நடிகர் விஜய்யின் இந்த முடிவுக்கு, தமிழகத்தின் பல பகுதிகளில் உள்ள விஜய் மக்கள் இயக்கத்தினர் மத்தியில் கடும் எதிர்ப்பு கிளம்பியுள்ளது. குறிப்பாக சேலத்தில் அவருடைய ரசிகர்கள் இடையே எதிர்ப்பு ஏற்பட்டு உள்ளது. ஏற்கெனவே இங்கு விஜய் ரசிகர்கள் திமுக - அதிமுக என இரு பிரிவாக நின்று சண்டை போட்டுக் கொண்டுள்ளனர்.

இந்த நிலையில் அதிமுக ஆதரவு நிலைப்பாட்டை விஜய் எடுத்துள்ளதால், இயக்கத்தையே கலைத்துவிட்டனர் ரசிகர்கள்.

சேலம் அழகாபுரம் பகுதியில் இருந்த, இளைய தளபதி விஜய் போக்கிரி மக்கள் இயக்கத்தை கலைத்ததோடு, உறுப்பினர் அட்டைகளையும் தீயில் போட்டுக் கொளுத்தினர் ரசிகர்கள்.

மன்ற தலைவர் ஆசைதம்பி, செயலாளர் மணிகண்டன், பொருளாளர் சசி உள்ளிட்டோர், மன்றத்தின் பிளக்ஸ் பெயர் பலகையையும் கிழித்து எறிந்தனர். ஆவேசமாக விஜய் எதிர்ப்பு கோஷங்களை முழங்கினர். அதனால் அந்த பகுதியில் பெரும் பரபரப்பு ஏற்பட்டது.

இது குறித்து மன்ற ரசிகர்கள் கூறும்போது, "விஜய் ரசிகர்மன்றத்தில் அனைத்து அரசியல் கட்சிகளை சேர்ந்தவர்களும் உறுப்பினர்களாக உள்ளனர். இந்த நிலையில் விஜய் ஒரு குறிப்பிட்ட கட்சிக்கு ஆதரவான நிலைப்பாட்டை எடுத்துள்ளார்.

ரசிகர்களை கலந்து ஆலோசிக்காமல் இப்படி ஒரு முடிவு எடுத்தது வருத்தம் அளிக்கிறது. எங்களை பொருத்தவரை நாங்கள் தி.மு.க.வின் ஆதரவாளர்கள். ஆனால் விஜய் அ.தி.மு.க.வுக்கு ஆதரவான நிலைப்பாட்டை எடுத்துள்ளதால் நாங்கள் மன்றத்தை கலைத்துவிட்டோம்," என்றனர்.

மதுரை மற்றும் காஞ்சிபுரம் பகுதிகளிலும் விஜய் முடிவுக்கு, ரசிகர்கள் எதிர்ப்பு தெரிவித்துள்ளனர்.

Actor · Admk · CINEMA · Dissolved · Election · Makkal Iyakkam · salem · Vijay

அதிமுகவுக்கு ஆதரவுக்கு எதிர்ப்பு: சேலத்தில் விஜய் மக்கள் இயக்கம் கலைப்பு!!

டெல்லி: லென்ஸ்ஆன்நியூஸ் என்ற இணையதளம் நடத்திய கருத்துக் கணிப்பில் தமிழக சட்டசபைத் தேர்தலில் அதிமுக கூட்டணி ஆட்சியைப் பிடிக்கும் என்று தெரிவிக்கப்பட்டுள்ளது.

லென்ஸ்ஆன்நியூஸ் இணையதளம் புதிதாக ஆரம்பிக்கப்பட்ட ஒன்றாகும். இது தமிழகம், புதுச்சேரி, கேரளா, அஸ்ஸாம், மேற்கு வங்கம் ஆகிய சட்டசபைத் தேர்தல்கள் நடைபெறவுள்ள மாநிலங்களில் கருத்துக் கணிப்பு ஒன்றை நடத்தியுள்ளது.

12 தொகுதிகளைத் தேர்வு செய்து அதில் 3000 பேரிடம் கருத்துக் கேட்டு முடிவுகளை வெளியிட்டுள்ளது இந்த இணையதளம்.

இந்த கருத்துக் கணிப்பில் கூறப்பட்டுள்ளதாவது...

160இடங்களில் போட்டியிடும் அதிமுகவுக்கு 100 இடங்கள் வரை வெற்றி கிடைக்கலாம். அதிமுக கூட்டணிக்கு 144 இடங்கள் வரை கிடைக்கும் வாய்ப்புள்ளது.

திமுக கூட்டணிக்கு 88 இடங்கள் வரை கிடைக்கலாம். மற்றவர்களுக்கு 2 இடங்கள் வரை கிடைக்கலாம்.

தனிப்பெரும்பான்மைக்கு 118 இடங்கள் தேவை. எனவே அதிமுகவால் தனிப்பெரும்பான்மையுடன் ஆட்சி அமைக்க முடியாது. கூட்டணிக் கட்சிகளின் பலத்தில்தான் அது ஆட்சி அமைக்க முடியும். எனவே அதிமுக கூட்டணி வென்று ஆட்சியைப் பிடித்தாலும் அது, ஜெயலலிதா வார்த்தைகளின்படி மைனாரிட்டி அரசாகவே இருக்கும் என்பது குறிப்பிடத்தக்கது.

அதிமுக கூட்டணிக்கு 47 சதவீத வாக்குகள் கிடைக்கும். அதேசமயம், திமுக கூட்டணிக்கு 46 சதவீத வாக்குகள் கிடைக்கும். மிக மிக குறுகிய இடைவெளியில் வாக்கு சதவீதம் இருந்தாலும் அதிமுகவுக்கு அதிக இடங்கள் கிடைக்க முக்கியக் காரணம், விஜயகாந்த்தின் தேமுதிக இக்கூட்டணியில் இணைந்திருப்பதால்தான்.

அதேசமயம், திமுக கூட்டணியில் பல தொகுதிகளில் மிகக் குறைந்த வாக்கு வித்தியாச அளவில்தான் தோல்வி இருக்கும். இதற்கு கூட்டணிக் கட்சியினரிடையே காணப்படும் ஒத்துழையாமை உள்ளிட்டவை காரணமாக இருக்கலாம்.

ஸ்பெக்ட்ரம் ஊழலால் முதல்வர் கருணாநிதியின் குடும்பத்தினர் பலன் அடைந்துள்ளனர் என்று 48 சதவீதம் பேரும், இல்லை என்று 21 சதவீதம் பேரும் கருத்து தெரிவித்துள்ளனர்.

திமுக அரசின் இலவச கலர் டிவியைப் பெற்றுள்ளீர்களா என்ற கேள்விக்கு 92 சதவீதம் பேர் ஆம் என்று கூறியுள்ளனர். அதாவது கிட்டத்தட்ட ஒட்டுமொத்த தமிழகமும் திமுக வழங்கிய இலவச டிவியைப் பெற்று பயன் அடைந்துள்ளது.

எந்தக் கட்சியால் சிறந்த ஆட்சியைத் தர முடியும் என்ற கேள்விக்கு திமுக என்று 46 சதவீதம் பேர் பதிலளித்துள்ளனர். அதிமுகவுக்குக் கிடைத்துள்ள ஆதரவு 42 சதவீதம் பேர் மட்டுமே.

தமிழக வாக்காளர்கள் மத்தியில் பிரபலமான தலைவராக கருணாநிதி விளங்குகிறார். முதல்வர் பதவிக்கு அவர்தான் பொருத்தமானவர் என்று 43 சதவீதம் பேரும், ஜெயலலிதா என்று 42 சதவீதம் பேரும் வாக்களித்துள்ளனர்.

இலங்கைக் கடற்படையினர் தமிழக மீனவர்கள் மீதான தாக்குதலைத் தடுக்க மத்திய அரசு போதிய நடவடிக்கை எடுக்கவில்லை என்று 61 சதவீத வாக்காளர்கள் தெரிவித்துள்ளனர்.

காங். கருத்துக் கணிப்பில் 77 இடங்கள்

இதற்கிடையே, காங்கிரஸ் கட்சி சார்பில் நடத்தப்பட்ட ரகசிய கருத்துக் கணிப்பில் திமுக-காங் கூட்டணிக்கு 77 இடங்கள் மட்டுமே கிடைக்கும் என தெரிய வந்துள்ளதாம்.

அதிமுக கூட்டணிக்கு 152 இடங்கள் கிடைக்கும் என்றும் இதில் தெரிய வந்துள்ளதாம். இடதுசாரிகளுக்கு 4 இடங்களும், பாஜகவுக்கு ஒரு சீட்டும் கிடைக்கும் என இந்தக் கருத்துக் கணிப்பு தெரிவித்துள்ளதாம்.

புதுச்சேரியில் 11 இடங்கள்

புதுச்சேரியில் திமுக, காங்கிரஸ் கூட்டணிக்கு 11 இடங்கள் மட்டுமே கிடைக்கும் என்றும் காங்கிரஸ் கருத்துக் கணிப்பு தெரிவித்துள்ளது. அதிமுக கூட்டணிக்கு 19 இடங்கள் கிடைக்குமாம்.

Admk · Alliance · Election · Feature · jayalalitha · TAMILNADU · Win144 seat

அதிமுக கூட்டணி தேர்தலில் வெல்லும்-144 சீட் கிடைக்கும்-கருத்துக் கணிப்பு

திமுக தேர்தல் அறிக்கை மக்கள் எண்ணங்களை பிரதிபலிக்கும் வகையில் அமைந்துள்ளது என, மத்திய அமைச்சர் ஜி.கே.வாசன் கூறினார்.

சட்டமன்ற தேர்தலையொட்டி காங்கிரஸ் கட்சியின் பிரச்சாரப் பாடல் சிடிக்கள் 'வெற்றி கீதம்' என்ற பெயரில் தயாரிக்கப்பட்டுள்ளன. இந்த பிரச்சார பாடல் சிடிக்கள் வெளியீட்டு விழா சென்னை ஆழ்வார்பேட்டையில் நடைபெற்றது. இந்நிகழ்ச்சியில் வாசன் கலந்து கொண்டு பிரச்சார சிடியை வெளியிட்டார்.

விழாவில், வாசன் பேசும்போது,

மத்திய, மாநில அரசின் திட்டங்கள் தொலை நோக்கு பார்வையுடன் செயல்படுத்தப்படுகின்றன. திமுக தேர்தல் அறிக்கை மக்கள் எண்ணங்களை பிரதிபலிக்கும் வகையில் அமைந்துள்ளது.

ஜனநயாக முற்போக்கு கூட்டணிக்கு மக்கள் ஓட்டு அளித்து வெற்றி பெறச் செய்வர். வரும் 30ம் தேதி நான் தேர்தல் பிரசாரத்தை துவங்கி அடுத்த மாதம் 11ம் தேதி வரை, 24 மாவட்டங்களில் பிரசாரம் மேற்கொள்கிறேன் என்றார்.

Dmk · Election · Feature · GK Vasan · TAMILNADU

திமுக தேர்தல் அறிக்கை: வாசன் பெருமிதம்

பெங்களூரு : ""என் மீது கூறப்படும் குற்றச்சாட்டுகளுக்கு, இடைத்தேர்தலில் பா.ஜ., வெற்றி பெறுவதன் மூலம் பதிலளிப்பேன்,'' என, முதல்வர் எடியூரப்பா கூறினார். கர்நாடக பா.ஜ.,வில் உட்கட்சி பூசல், நாளுக்கு நாள் சூடுபிடித்து வருகிறது. டில்லிக்கு சென்றுள்ள மாநில பா.ஜ., தலைவர் ஈஸ்வரப்பா தலைமையிலான அதிருப்தியாளர்கள், பா.ஜ., தலைவர்கள் அத்வானி, சுஷ்மா சுவராஜ், அருண் ஜெட்லி, முரளிமனோகர் ஜோஷி ஆகியோரை சந்தித்து, முதல்வர் பதவியிலிருந்து எடியூரப்பாவை இறக்க வேண்டும் என்று வற்புறுத்தினர்.
இந்நிலையில், முதல்வர் எடியூரப்பா இன்று டில்லி செல்கிறார். பெங்களூருவில் நேற்று அவர் கூறுகையில், "கர்நாடகாவில் நடக்கும் மூன்று தொகுதி இடைத்தேர்தலில், பா.ஜ., வெற்றி பற்றி தான் நான் சிந்தித்து வருகிறேன். கடவுள் அருளால் மூன்று தொகுதிகளிலும் பா.ஜ., கண்டிப்பாக வெற்றி பெறும். இது பா.ஜ.,வின் கவுரவ பிரச்னை.

எதிர்க்கட்சிகளான காங்கிரஸ், ம.ஜ.த., கூறிய குற்றச்சாட்டுகள் எடுபடாது. கர்நாடக பா.ஜ.,வில் எந்த குழப்பமும் இல்லை. ஈஸ்வரப்பா என் நெருங்கிய நண்பர். அவருக்கும், எனக்கும் எந்த பிரச்னையும் இல்லை. மீடியாக்கள் தேவையில்லாத பிரச்னையை கூறி வருகின்றன. நாங்கள் ஒற்றுமையுடன் செயல்படுகிறோம். எங்களிடையே எந்த கருத்து வேறுபாடும் இல்லை' என்றார்.

நேற்று முன்தினம் முதல்வர் எடியூரப்பாவின் ஆலோசனை கூட்டத்தில் பங்கேற்ற சில அமைச்சர்கள், டில்லிக்கு சென்றுள்ளனர். மேலிட தலைவர்களை சந்தித்து, எடியூரப்பா மீது புகார் கூற திட்டமிட்டுள்ளனர்.

கர்நாடக மாநில பா.ஜ., மேலிட பொறுப்பாளர் தர்மேந்திர பிரதான் பெங்களூரு வந்து, அதிருப்தியாளர்களை சமாதானப்படுத்துவார் என்று தெரிகிறது.

Election · Feature · INDIA · Yeddyurappa

இடைத்தேர்தல் வெற்றி மூலம் குற்றச்சாட்டுக்களுக்கு பதில் : எடியூரப்பா

திண்டுக்கல்: ""பொய்யின் மொத்த உருவமான அ.தி.மு.க., தேர்தல் அறிக்கையை மக்கள் நம்ப மாட்டார்கள்,'' என பா.ம.க., நிறுவனர் ராமதாஸ் பேசினார்.

திண்டுக்கல்லில் தி.மு.க., கூட்டணி கட்சிகளின் நிர்வாகிகள் கூட்டத்தில் அவர் பேசியதாவது: முதல்வர் கருணாநிதி தேர்தல் அறிக்கையில் கிரைண்டர், மிக்சி தருவதாகவும், பெண்களின் திருமணத்திற்கு ரூ.30 ஆயிரமும், படிப்பிற்கு ரூ.20 ஆயிரமும் வழங்குவதாக அறிவித்தார். பள்ளியில் பத்தாம் வகுப்பு மாணவன் காப்பியடிக்கும் போது, பறக்கும் படையினரிடம் சிக்கிக் கொள்வான். இதுமாதிரி தி.மு.க., தேர்தல் அறிக்கையை, ஜெயலலிதா காப்பியடிப்பது வெளியிட்டுள்ளார். இதை மக்கள் கண்டுபிடித்து விட்டார்கள். ஏழைகளுக்கு ஆடு, மாட்டை இலவசமாக வழங்குவாராம். ஜெயலலிதா தமிழர்களை ஆடு, மாடு மேய்க்க சொல்கிறார். கருணாநிதி மாணவ, மாணவிகளுக்கு லேப்டாப் தந்து, நன்றாக படித்து, தமிழர்கள் உலக அரங்கில் முன்னேற வேண்டும் என்று நினைக்கிறார்.

தமிழகத்தில் 30 லட்சம் பேர் வறுமை கோர்ட்டிற்கு கீழ் உள்ளனர். இவர்களுக்கு எப்படி ஆடு, மாடு கொடுக்க முடியும். பொய்யின் மொத்த உருவமான அ.தி.மு.க.,வின் தேர்தல் அறிக்கையை மக்கள் நம்ப மாட்டார்கள். கடந்த காலத்தில் ஜெயலலிதா, தனது வளர்ப்பு மகனுக்கு திருமணத்தை நடத்தி வைத்தார். பின்பு, அவர் மீதே கஞ்சா வழக்கு போட்டார். ஒரே நாளில் இரண்டரை லட்சம் அரசு ஊழியர்களை வீட்டுக்கு அனுப்பினார். மீண்டும் கருணாநிதி முதல்வராக நீங்கள் பாடுபட வேண்டும். தமிழகத்தில் வரலாறு காணாத அளவிற்கு தேர்தல் கமிஷன் கெடுபிடிகளை விதித்துள்ளது. வாகன சோதனை என்ற பெயரில் பலவித இன்னல்களுக்கு மக்கள் தள்ளப்பட்டுள்ளனர். வணிகர்களும், பொதுமக்களும் பாதிக்கப்பட்டுள்ளனர். தேர்தல் கமிஷன் நடவடிக்கைகளுக்கு ஐகோர்ட் கடும் கண்டனம் தெரிவித்துள்ளது. இவ்வாறு அவர் பேசினார். நிகழ்ச்சியில் அமைச்சர் ஐ.பெரியசாமி, சித்தன் எம்.பி., திண்டுக்கல் பா.ம.க., வேட்பாளர் ஜே.பால்பாஸ்கர் உட்பட பலர் பங்கேற்றனர்.

Admk · BMK · Election · Feature · Ramadhas · TAMILNADU

பொய்யின் மொத்த உருவம் அ.தி.மு.க., தேர்தல் அறிக்கை: பா.ம.க., ராமதாஸ்

அகில இந்திய நாடாளும் மக்கள் கட்சித் தலைவர் நடிகர் கார்த்திக் சென்னையில் நேற்று அக்கட்சி வேட்பாளர்கள் பட்டியலை வெளியிட்டு நிருபர்களுக்கு பேட்டி அளித்தார்.

அப்போது அவர், ’’இந்த தேர்தலில் அகில இந்திய நாடாளும் மக்கள் கட்சி சார்பில் போட்டியிட விருப்பம் தெரிவித்து மொத்தம் 1300 விண்ணப்பங்கள் வந்திருந்தன. வேறு கட்சிகளைச் சேர்ந்த சிலரும் அனுப்பியிருந்தார்கள். அந்த விண்ணப்பங்களை கண்டறிந்து நீக்கியதால்தான் வேட்பாளர் பட்டியல் தயாரிக்க தாமதம் ஏற்பட்டது.

இன்று 14 வேட்பாளர்கள் கொண்ட முதல்பட்டியலை வெளியிடுகிறேன். கடையநல்லூர் தொகுதியில் எங்கள் கட்சி சார்பில் போலி வேட்பாளர் வேட்பு மனுதாக்கல் செய்துள்ளார். தோல்வி பயத்தால் இப்படி செய்திருக்கிறார்கள். அதுதொடர்பாக விசாரணை நடத்தி வருகிறோம்.

எங்கள் கட்சி சார்பில் போட்டியிடும் வேட்பாளர்களை அறிவிக்கிறேன். சங்கரன்கோவில் தொகுதியில் பி.சுப்புலட்சுமி, திருப்பரங்குன்றம் தொகுதியில் கே.சாந்திபூசன், நாங்குனேரி தொகுதியில் எம்.சண்முகசுந்தரம், ராதாபுரம் தொகுதியில் ஆர்.மரகதவல்லி, அம்பாசமுத்திரம் தொகுதியில் குவைத்.எம்.குமார்,

ஸ்ரீவைகுண்டம் தொகுதியில் எம்.எஸ்.ராஜா, கடையநல்லூர் தொகுதியில் எம்.பாலசுப்பிரமணியன், தென்காசி தொகுதியில் எஸ்.பரமசிவம், வாசுதேவநல்லூர் தொகுதியில் எஸ்.பிச்சைக்கனி, ஒட்டப்பிடாரம் தொகுதியில் சி.சங்கர், சாத்தூர் தொகுதியில் கே.எஸ்.வைரமுத்து, ராஜபாளையம் தொகுதியில் கே.சூரியமகாராஜா,

விருதுநகர் தொகுதியில் எஸ்.செந்தாமரை பாண்டியன், ஸ்ரீவில்லிபுத்தூர் தொகுதியில் எஸ்.சுப்பிரமணியன் ஆகியோர் போட்டியிடுகின்றனர்.

இதில், வேட்பாளர்கள் சுப்புலட்சுமியும், சங்கரும் கூலித் தொழிலாளர்கள் என்பது குறிப்பிடத்தக்கது. இரண்டாவது கட்ட வேட்பாளர் பட்டியல் இன்று (வியாழக்கிழமை) வெளியிடப்படும். அதில் 15 வேட்பாளர்கள் இடம்பெறுவார்கள்.

எங்கள் கட்சி, தென்மாவட்டங்களில் 40 தொகுதிகளில் நிற்க முடியும். நேரமில்லாத காரணத்தால் அனைத்து தொகுதிகளிலும் போட்டியிட முடியாத நிலை ஏற்பட்டுள்ளது.

நாங்கள் போட்டியிடும் தொகுதிகள் தவிர மற்ற தொகுதிகளில் யாரை ஆதரிப்பது என்று ஓரிரு நாளில் அறிவிப்பேன். நிச்சயமாக அ.தி.மு.க.வுக்கு ஆதரவு தெரிவிக்கமாட்டோம்.

ஆள் பலம், பணம் பலத்தைக் காட்டி எங்களை மிரட்டுகிறார்கள். யாருடைய மிரட்டலுக்கும் நாங்கள் அஞ்சமாட்டோம்.

எங்களுக்கு காந்தி போலவும் இருக்க தெரியும். சுபாஷ் சந்திரபோஸ், முத்துராமலிங்க தேவர் போலவும் இருக்க முடியும். நாட்டில் சட்டத்தின் ஆட்சி நடக்கிறது. எங்களை மிரட்டியவர்கள் பற்றி தேர்தல் கமிஷனில் புகார் கொடுத்து உரிய நடவடிக்கை எடுக்க வலியுறுத்துவோம். தேர்தலில் மிரட்டல் இருக்கக்கூடாது. ஆரோக்கியமான போட்டி இருக்க வேண்டும்.

எங்கள் கட்சி வேட்பாளர்களை ஆதரித்து பிரசாரம் செய்ய வேண்டி இருப்பதால் நான் போட்டியிடுவது பற்றி இன்னமும் முடிவு செய்யவில்லை.

உசிலம்பட்டி தொகுதியில் போட்டியிடுவது இல்லை என்ற முடிவை மறுபரிசீலனை செய்வோம். சிவகாசி தொகுதியில் போட்டியிடுவது குறித்தும் ஓரிரு நாளில் அறிவிப்போம். 28-ந் தேதி முதல் பிரசாரத்தில் ஈடுபடுவேன்.

தொகுதிகள் ஒதுக்கீடு தொடர்பாக அ.தி.மு.க. எங்களை மிகவும் துன்புறுத்தியது. ஆனால், கலைஞர் கருணாநிதிக்கு தாராள குணம். எல்லா கட்சியினரையும் மதித்து தொகுதிகளை தாராளமாக ஒதுக்கி கொடுத்துள்ளார்’’என்று கூறினார்.

Actor · ADMK no Vote · Election · Feature · Karthik · TAMILNADU

அதிமுகவுக்கு யாரும் ஓட்டுப்போட வேண்டாம் : நடிகர் கார்த்திக்

தி.மு.க. கூட்டணியில் உள்ள அனைத்துக் கட்சிகளும் 234 தொகுதிகளிலும் ஒருங்கிணைந்து ஒற்றுமையுடன் தேர்தல் பிரசாரம் மேற்கொள்ள வேண்டும் என்று ஆலோசனைக் கூட்டத்தில் முடிவு செய்யப்பட்டது.
மத்திய, மாநில அரசுகளின் சாதனைகளை விளக்கித் தேர்தல் பிரசாரத்தில் ஈடுபடவேண்டும் என்று முதல்வர் கருணாநிதி தலைமையில் நடைபெற்ற இந்தக் கூட்டத்தில் முடிவு செய்யப்பட்டது.
கூட்டணிக் கட்சித் தலைவர்களின் கூட்டம் முதல்வரும், திமுக தலைவருமான மு. கருணாநிதி தலைமையில் சென்னையிலுள்ள அண்ணா அறிவாலயத்தில் வெள்ளிக்கிழமை மாலை நடைபெற்றது.
துணை முதல்வர் மு.க.ஸ்டாலின், தமிழ்நாடு காங்கிரஸ் கமிட்டித் தலைவர் கே.வீ. தங்கபாலு, பா.ம.க. நிறுவனத் தலைவர் ராமதாஸ், விடுதலைச் சிறுத்தைகள் கட்சியின் தலைவர் தொல். திருமாவளவன், கொங்கு நாடு முன்னேற்றக் கழகத் தலைவர் பெஸ்ட் ராமசாமி, இந்திய யூனியன் முஸ்லிம் லீக் தலைவர் காதர் மொய்தீன், திராவிடர் கழகத் தலைவர் கி.வீரமணி இந்தக் கூட்டத்தில் பங்கேற்றனர். கூட்டம் 2 மணி நேரத்திற்கும் மேலாக நடைபெற்றது. அனைத்துத் தொகுதிகளிலும் கூட்டணிக் கட்சியினர் ஒருங்கிணைந்து எவ்வாறு பிரசாரம் செய்வது என்பது குறித்துப் பேசப்பட்டது.
சாதனையை விளக்கிப் பிரசாரம்: கடந்த 5 ஆண்டுகளில் திமுக ஆட்சியில் செயல்படுத்தப்பட்ட மக்கள்நலத் திட்டங்கள் ஒவ்வொரு குடும்பத்தையும், தனிமனிதனையும் சென்றடைந்திருக்கின்றன. இதை மக்களிடத்தில் கொண்டுசெல்ல வேண்டும் என்று ஆலோசனை தரப்பட்டது.
இந்தக் கூட்டத்திற்குப் பிறகு நிருபர்களிடம் தலைவர்கள் தெரிவித்த கருத்துகள் விவரம்:
முதல்வர் கருணாநிதி: திருவாரூரில் 23-ந் தேதி நடைபெற உள்ள பொதுக்கூட்டத்தில் அனைத்துக் கட்சித் தலைவர்களும் பங்கேற்பார்கள். பிரதமர் மன்மோகன் சிங், காங்கிரஸ் தலைவர் சோனியா காந்தி தமிழகத்துக்குத் தேர்தல் பிரசாரம் செய்ய வருவது தொடர்பாக மனு தாக்கல் முடிந்த பிறகு முடிவு செய்யப்படும்.
தமிழக காங்கிரஸ் தலைவர் கே.வீ.தங்கபாலு: மத்திய மாநில அரசுகளின் சாதனைகளை விளக்கிப் பிரசாரம் செய்யப்படும். கூட்டணிக் கட்சியினர் அனைவரும் ஒருங்கிணைந்து எவ்வாறு பிரசாரம் செய்வது என்பது குறித்து திட்டமிடப்பட்டது.
விடுதலைச் சிறுத்தைகள் கட்சியின் தலைவர் தொல்.திருமாவளவன்: 234 தொகுதிகளிலும் திமுக கூட்டணி அமோக வெற்றிபெறும். குறிப்பாக வடமாவட்டங்களில் உள்ள 120 தொகுதிகளில் 90 சதவீத தொகுதிகளில் உறுதியாக வெற்றி பெறுவோம்.

Alliance · Dmk · Election · Feature · TAMILNADU

தி.மு.க. கூட்டணி ஒருங்கிணைந்து பிரசாரம்

திருப்பூர்: திருப்பூர் வடக்கு தொகுதியில் போட்டியிடுவதன் மூலம் திருப்பூரில் 34 ஆண்டுகளுக்கு பிறகு மீண்டும் திமுக போட்டியிடுகிறது. கடந்த 1951ம் ஆண்டு முதல் 13 சட்டமன்ற தேர்தல்களை சந்தித்த திருப்பூர் சட்டமன்ற தொகுதி, தொகுதி மறுசீரமைப்பு காரணமாக திருப்பூர் வடக்கு, திருப்பூர் தெற்கு என 2 தொகுதிகளாக பிரிந்து 14வது சட்டமன்ற தேர்தலை சந்திக்கிறது. திருப்பூர் தொகுதியில் தி.மு.க 3 முறை மட்டுமே களம் கண்டுள்ளது. கடந்த 1967, 1971 மற்றும் 1977ம் ஆண்டு நடந்த சட்டப்பேரவை தேர்தல்களில் மட்டுமே திருப்பூர் தொகுதியில் தி.மு.க போட்டியிட்டது. அதன்பின்னர் நடந்த 7 சட்டமன்ற தேர்தல்களிலும், தி.மு.க போட்டியிடவில்லை. மாறாக தி.மு.க கூட்டணியில் அங்கம் வகித்த கம்யூனிஸ்ட், பாரதிய ஜனதா மற்றும் ம.தி.மு.க கட்சிகளே போட்டியிட்டன. 34 ஆண்டுகளுக்கு பின்னர் மீண்டும் திருப்பூர் வடக்கு தொகுதியில் தி.மு.க போட்டியிடுகிறது.

34 years after · Dmk · Election · TAMILNADU · Tirupur place

புதிய வரவு