பொங்கல் சிறப்பு ரயில்: நாளை முன்பதிவு

சென்னை: பொங்கல் பண்டிகையை முன்னிட்டு, சென்னையில் இருந்து திருநெல்வேலி, செங்கோட்டை ஆகிய இடங்களுக்கு சிறப்பு விரைவு ரயில் சேவைகள் இயக்கப்பட உள்ளன. பொங்கல் பண்டிகை விடுமுறை நாள்களில் சென்னையில் இருந்து தென் மாவட்ட நகரங்களுக்கு இயக்கப்படும் அனைத்து முக்கிய ரயில்களிலும் முன்பதிவு முடிந்துள்ளது.

இந்நிலையில், நெரிசலைச் சமாளிக்கும் வகையில் சிறப்பு ரயில் சேவைகளை தெற்கு ரயில்வே வியாழக்கிழமை அறிவித்துள்ளது. இதுகுறித்து வெளியிடப்பட்டுள்ள செய்தி குறிப்பில்;

சென்னை சென்ட்ரல்-திருநெல்வேலி (06009): சென்ட்ரலில் இருந்து 12ம் தேதி இரவு 7.30-க்குப் புறப்பட்டு, மறுநாள் காலை 9.35 மணிக்கு நெல்லைக்கு சென்று சேரும்.

திருநெல்வேலி-சென்னை சென்ட்ரல் (06010): திருநெல்வேலியில் இருந்து 13ம் தேதி பிற்பகல் 2.55- க்குப் புறப்பட்டு, மறுநாள் காலை 5 மணிக்கு சென்னை சென்ட்ரலுக்கு வந்து சேரும்.

சென்னை - சென்ட்ரல்- செங்கோட்டை விரைவு ரயில் (மயிலாடுதுறை வழி) (06011): இந்த ரயில் சென்ட்ரலில் இருந்து 11ம் தேதி இரவு 9.50- க்குப் புறப்பட்டு, மறுநாள் பகல் 12.30 மணிக்கு செங்கோட்டைக்கு சென்று சேரும்.

செங்கோட்டை- சென்னை சென்ட்ரல் விரைவு ரயில் (06012) (விருத்தாச்சலம், எழும்பூர் வழி): இந்த ரயில் செங்கோட்டையில் இருந்து 12ம் தேதி பிற்பகல் 2.30- க்குப் புறப்பட்டு, மறுநாள் காலை 5 மணிக்கு சென்னை சென்ட்ரலுக்கு வந்து சேரும்.

சென்னை எழும்பூர்-திருநெல்வேலி விரைவு ரயில் (மயிலாடுதுறை வழி) (06103): இந்த ரயில் எழும்பூரில் இருந்து 15ம் தேதி இரவு 10.45- க்குப் புறப்பட்டு, மறுநாள் பகல் 12.15 மணிக்கு திருநெல்வேலியைச் சென்றடையும்.

திருநெல்வேலி- சென்னை எழும்பூர் விரைவு ரயில் (06104) (விருத்தாச்சலம் வழி): இந்த ரயில் திருநெல்வேலியில் இருந்து 16ஆம் தேதி பிற்பகல் 2.55-க்குப் புறப்பட்டு, மறுநாள் அதிகாலை 4.25 மணிக்கு சென்னை சென்ட்ரலுக்கு வந்து சேரும்.

இந்த சிறப்பு ரயில்களில் பயணம் செய்ய நாளை சனிக்கிழமை (ஜன.,8) முதல் முன்பதிவு தொடங்குகிறது என்று தெரிவிக்கப்பட்டுள்ளது.